Fuimos, somos y seremos CD

Hamabi abesti dakartza Vendettaren “Fuimos, somos y seremos” disko berriak, horietako hiru instrumentalak eta biziki itsaskorrak. Selva Baronek koruak egin ditu disko bitaminiko eta kementsuan. Haize fresko eta giro beroa nahastuta datoz ska, reggae, country rock eta pop melodikoen zertzeladekin batera. Ahotsak ederki atondu dituzte, Javier eta Pelloren ahotsaz gain, Luisillok aurrekoetan bezala berea ere jarri du. Pellok gero eta indar nabariagoa du taldean eta goraka doan musikaria da urrats sendoekin, eta boskoteak ere maila altuago batera iritsi da ska soinuen torlojuari itzuli berri honekin. Vendetta taldeak bide berriak irekitzen darrai erabat; ahotsetan bikain, funts eta berezko sonoritate sendoaz, musika ibilbideari ezin hobeto eutsiz. Iragana, oraina eta geroa oparoa baino ez luke izan behar talde honek, orain arteko ibilbidea ikusita ikusirik, zalantzarik ez. Has dadila saioa.