Ez entzun CD

Zazkel taldearen bigarren diskoak «Ez entzun» du izenburua. Zazkel taldeak musikaren kontakizun askotarikoa du, berdin nahastuko du funkya poparekin, raparekin, rockarekin, diskoarekin, post-punkarekin, reggaerekin, soularekin zein elektronikaren sastadekin. Maiz entzungo genituen Rick James, Itoiz, Jackson 5, Hertzainak, Talking Heads, M-ak, Bowie, Negu Gorriak edo The Clash. Inork esango du nahiago duela jatorrizko talde horiek entzutea haien ondokoak baino. Baina talde haiek beste zerbaiten ondorengoak izan ziren ere bai, eta, gero, eraginkor. Zazkel taldea euskal ondorengoetakoa da eta merezi dute entzunaldi eklektikoa, askotariko osagaiekin konbinazio duinena lortzeko bidea egin baitute ludikotasun konprometituarekin. Zazkel entzun daitekeen bidean da.