• Emakumeen barne konexioa, intuizioa eta indarra aldarrikatzen ditu ikuspegi garaikide batetik, folklore kodeetatik urrun.
• Single honek inflexio-puntu argia markatzen du bere ibilbidean, eta indarrez datorren etapa berri baten hasiera iragartzen du, dimentsio handiagoko proposamen batera jauzi eginez.

Gaur ikusi du argia Eider Saezen SORGINKERIA izeneko single berriak, bere ibilbide artistikoan bide berri bat irekitzen duena. Lan honetan, emakumeen nortasuna, intuizioa eta barne-boterea jorratzen ditu, soinu berrien esplorazioan sakonduz, baina bere esentzia galdu gabe.

Magia ilunarekin edo folklorikoarekin lotutako interpretazio tradizionaletatik urrun, SORGINKERIAk «sorginkeria» emakume guztien berezko zerbait bezala ulertzea proposatzen du: intuizioa, barne konexioa, sentsibilitatea, indarra eta konplizitate kolektiboa. Historikoki isilarazia edo baztertua izan den emakumeen barne-botere hori, gaur egun eraldaketa pertsonal eta kolektiborako tresna gisa aldarrikatzen da.

Bideoklipa: bidai bat barne mundura

Dagoeneko aurreko lanetan egin duen bezala, single honetan aurkezten digu Eiderrek bere lan berriaren unibertso estetikoa, iruditeria propioarekin: sinbolikoa, emozionala eta garaikidea. Bideoklipean, protagonista hasieran bere buruarekiko deskonektatuta ageri da, egungo zarata eta gainestimulazioaren erdian galduta. Pixkanaka, esnatze-prozesu batean murgiltzen da, eta betidanik hor egon den barne-mundu hori deskubritzen hasten da.

Bere ibilbidean zehar landu duen lengoaia bisualari jarraituz, Eiderrek folkloretik urrun dagoen irudikapen bat proposatzen du: metaforetan, emozioetan eta espiritualtasun garaikidean oinarritutakoa. Bidean, beste emakume batzuk agertzen dira, horien artean Mirua taldeko Maitane Iruiñ, eta haien presentziak konplizitatearen, indarraren eta komunitatearen ideia indartzen du.

Bilakaera sonoroa

Bere ibilbidean zehar, Eiderrek etengabeko eboluzio artistikoa mantendu du, soinu berriak esploratuz bere nortasuna galdu gabe. Ildo horretan, SORGINKERIA da orain arteko proposamenik irekiena eta irisgarriena, berezkoa duen sakontasun sinbolikoari uko egin gabe.

Single honek inflexio-puntu argia markatzen du bere ibilbidean, eta indarrez datorren etapa berri baten hasiera iragartzen du. Dimentsio handiagoko proposamen batera jauzi eginez, disko berriarekin bere musika publiko zabalago baterantz hedatzeko prest dagoela erakusten du.

Txusok ekoitzi du abestia (Zilibito Records, Hazas…) eta Gabriel Mozo-k zuzendu du bideoklipa. Disko berria urte amaieran kaleratuko da, eta dagoeneko lehen aurrerapen honek agerian uzten du proiektuak indartsu eta nortasun handiz egingo duela bere bidea.

Singlea dagoeneko eskuragarri dago plataforma digital guztietan.