Gaur ez da dena grisa CD

Biok taldearen “Gaur ez da dena grisa” izenburuko bigarren diskoaren ildoak aurrekoaren segida direla esango dugu. Lau urte pasatu dira baina musika jarrerak berdin jarraitzen du. “Gaur ez da dena grisa” diskoa metal gordin eta pisutsua da. Biok taldeak makina birrintzailea du bere barnean. Kantua joan eta kantua etorri, Biok taldeak etengabeko astinaldia eskaintzen digu. Biok taldearen kantuek thrash metalaren lekukoa ederki gordetzen dute. Gitarren riffak boteretsu eta urratzaileak dira, zauriaren gainean kolpatzen uneoro. Biok taldeak, nahiz eta metalaren zama daraman, ez da geldoa; metal arina da, abiadura handikoa. Ahotsak antzekoak dira, kolpeka doaz, indartsu eta ozen, belarriak zauritzen soinuaren bi muturretan: grabeetan zein agudoetan. Koltxoi lana eginez, koruek eta zenbait melodiek neurri txiki batean samurtzen dituzte abestiak. Biok taldearen jarrera birrintzailea da; helburu nagusia metala bera abestiz txikitzea da, hori baita muturreko metalaren xedea.